Logo

मंगलवार, आषाढ १४ गते २०७९

images

कश्मीरमा भारतलाई नेपालको साथ, परराष्ट्रमन्त्री ज्ञवालीले भने–"धारा ३७० भारतको आन्तरिक मामिला हो !"

कश्मीरमा भारतलाई नेपालको साथ, परराष्ट्रमन्त्री ज्ञवालीले भने–"धारा ३७० भारतको आन्तरिक मामिला हो !"

नेपालपाना भाद्र १८ २०७६
  • 54.3K
    SHARES
  • कश्मीरमा भारतलाई नेपालको साथ, परराष्ट्रमन्त्री ज्ञवालीले भने–"धारा ३७० भारतको आन्तरिक मामिला हो !"

    काठमाडौं । नेपालले जम्मु–कश्मीरको विशेषाधिकार खारेज गर्ने निर्णय भारतको आन्तरिक विषय भएको जनाएको छ ।

    लामो समयसम्म कश्मीर विवादमा मौनता साँधेको नेपालले अन्ततः भारतकै अपेक्षाअनुसार भारतीय संविधानको धारा खारेज गर्ने कदम उसैको आन्तरिक मामिला भएको प्रतिक्रिया दिएको हो । 

    माल्दिभ्सको राजधानी मालेमा जारी इन्डियन ओसन कन्फ्रनेन्स (हिन्द महासागर सम्मेलन) मा भाग लिन पुगेका परराष्ट्रमन्त्री प्रदीप ज्ञवालीले संविधानका व्यवस्था फेरबदल गर्नु भारतको आन्तरिक मामिला भएको र यो गर्ने अधिकार भारतलाई रहेको बताएका हुन् । 

    भारतीय सञ्चारमाध्यम एएनआईसँग कुरा गर्दै मन्त्री ज्ञवालीले कश्मीरमा रहेका नेपालीहरुबारे चिन्तित रहेको र उनीहरु सकुशल रहेकोमा खुशी व्यक्त गरेका छन् । 

    दक्षिण एसियाली क्षेत्रीय सहयोग संगठन (सार्क) को अध्यक्षता समेत गरिरहेको नेपालले विवादहरुलाई सदस्य मुलुकहरुका बीच छलफल गरेर सल्ट्याउन समेत आग्रह गरेको छ ।

    तनावलाई बढोत्तरी दिनु समाधानतर्फको कदम नभएको जनाउँदै परराष्ट्रमन्त्री ज्ञवालीले भने–" द्वन्द सबैभन्दा खराब विकल्प हो र हरेक मुलुकले यसलाई निषेध गर्नुपर्छ ।"

    कश्मीर मामिलामा आशाका केही किरण देखिएको तथा तनाव घटाएर छलफल र वार्तालापमार्फत समस्याको समाधान गर्नतर्फ उन्मुख हुन परराष्ट्रमन्त्री ज्ञवालीले आग्रह गरे । 

    कश्मीरलाई विशेषाधिकार दिने धारा खारेज गरेपछि पाकिस्तानले आपत्ति जनाउँदै भारतविरुद्ध आक्रोश पोखिरहेको छ । इस्लामावादले कश्मीरमा अन्तर्राष्ट्रिय हस्तक्षेपको माग गरिरहँदा भारतले यो आफ्नै आन्तरिक मामिला भन्दै पाकिस्तानविरुद्ध चर्को प्रतिवाद गरिरहेको छ ।

    भाद्र १८, २०७६ बुधवार २३:४६:५६ बजे : प्रकाशित

    नेपालपाना

    सम्बन्धित समाचार

    Copyright © All right reserved to Nepalpana

    Site By: SobizTrend