काठमाडौँ । नेपाली जनताको अपार विश्वास र इतिहासकै सर्वाधिक करिब दुई तिहाइ बहुमत प्राप्त गर्दै प्रधानमन्त्रीको जिम्मेवारी सम्हालेका प्रधानमन्त्री बालेन शाहको सरकारले भर्खर आफ्नो कार्यकालको पहिलो महिना पूरा गरेको छ ।

वर्षौंदेखिको जर्जर बेथिति, नीतिगत भ्रष्टाचार र सुस्त कार्यशैलीबाट वाक्कदिक्क भएका जनताका लागि यो एक महिना 'आशाको नयाँ बिहानी' बनेर उदाएको छ । देशको बागडोर सम्हालेको ३० दिनभित्रै प्रधानमन्त्री शाहले देखाएको दृढता र कार्यशैलीले समग्र राज्य संयन्त्रमा तरंग पैदा गरेको छ ।

सुशासन र प्रशासनिक चुस्तता

प्रधानमन्त्री शाहले पदभार ग्रहण गर्दा नै काम गर्नेलाई अवसर र ढिलासुस्ती गर्नेलाई दण्डको नीति अघि सारेका थिए। त्यसको परिणामस्वरूप महिनौँदेखि अड्किएका फाइलहरू र विकास निर्माणका परियोजनाहरूमा देखिएका अवरोधहरूलाई उनले युद्धस्तरमा हल गरेका छन् ।

सेवा प्रवाहमा ढिलासुस्ती गर्ने र कार्यालयमा अनुपस्थित रहने कर्मचारीहरूमाथि कडा निगरानी राख्दै सेवाग्राहीमैत्री वातावरण बनाउन उनले थालेको अभियानले जनतामा राहतको महसुस गराएको छ ।

यससॅगै, शक्ति र पहुँचको आधारमा चल्ने सरकारी संयन्त्रलाई उनले नियम र कानुनको दायरामा ल्याएका छन् । 

'बालेन स्टाइल' को कार्यसम्पादन

सामान्य राजनीतिज्ञभन्दा फरक प्रधानमन्त्री शाहले फिल्डमै पुगेर अनुगमन गर्ने र समस्याको तत्काल समाधान खोज्ने 'ग्राउन्ड जिरो' शैली अपनाएका छन्। 'हामीले पाँच वर्षका लागि जनताको म्यान्डेट पाएका छौँ। यो समय भनेको अलमल गर्ने होइन, परिणाम दिने हो । बेथितिको अन्त्यका लागि कठोर हुनैपर्छ र हामी हुन्छौँ,' प्रधानमन्त्रीको यो भनाइले मन्त्रालय र मातहतका निकायहरूमा नयाँ ऊर्जा भरिदिएको छ ।

जनस्तरमा उत्साह

यो एक महिनामा प्रधानमन्त्रीको कदमलाई लिएर सामाजिक सञ्जालदेखि चिया पसलसम्म सकारात्मक चर्चा छ। जनताले वर्षौंदेखि खोजेको 'पर्फर्मेन्स' बालेन सरकारले दिन थालेको भन्दै नागरिक समाज र युवापुस्ताले यसको खुलेर प्रशंसा गरेका छन् ।

प्रमुख उपलब्धिहरूको सार

• सार्वजनिक सेवा: राहदानी, राष्ट्रिय परिचयपत्र र सरकारी सेवामा देखिने लामो लाइनको समस्या समाधानको चरणमा ।

• आर्थिक सुधार: अर्थतन्त्रलाई चलायमान बनाउन व्यवसायी र लगानीकर्ताहरूसँगको निरन्तर संवाद र नीतिगत सरलीकरण ।

• विधिको शासन: कानुन कसैका लागि पनि सानो वा ठूलो नहुने सन्देश दिँदै कानुन कार्यान्वयनमा देखिएको दृढता ।

आगामी यात्रा

पहिलो एक महिना 'सेटिङ' र 'सुधार' मा केन्द्रित भएको बालेन सरकार अब ठूला पूर्वाधार विकास र दीर्घकालीन आर्थिक योजनाहरू कार्यान्वयनमा लाग्ने तयारीमा छ । जनताले दिएको दुई तिहाइको मतको कदर गर्दै यही गतिमा काम जारी रहे नेपालले पाँच वर्षमा एउटा नयाँ उचाइ हासिल गर्ने निश्चित प्रायः देखिन्छ । सरकारको यो 'एक्सन-ओरिएन्टेड' यात्राले नेपाली राजनीतिमा विकास र सुशासनको नयाँ मानक स्थापित गर्ने अपेक्षा गरिएको छ।